08‏/08‏/2009

المدونون يلتقون فإنتبهوا أيها القارئون أحم أحم معلش بكح


انا الجالس علي العرش /تصوير خالد فودة
من علي أيدى الشمال زعيم الحلف مصطفي صلاح (مش عارف)
محمد غالية (هل تبحث عن السعادة)عادل(البلد دى فيها حكومة)
مصطفي حسان (هرتلة) د/ ياسر عبد الفتاح (ومضات )
صلاح العميري(مسدس صغير)
باقي الصور ادعولنا تترفع بسرعة
في تلك الحديقة التي ساهم الأغاخان في بنائها لإعادة ذكري الفاطميين
وإفتتحتها السيدة سوزان حرم الجدع ده اللي اسمه إيه يا تري إسمه إيه؟؟؟؟
اللي يعرف هديله كيس شيبسي تلك الواقعة علي طريق دار الإفتاء
وفي درجة حرارة كانت كافية لتجعل وجنتي المكلبزتين متعرقتين
فقد كان التاكسي الذى أقلني أنا والزميلان بدراوى من الإسكندرية
مدونة طعم البيوت

وخالد فودة الباحث عن المتاعب والصراحة الإتنين تعبوني جداً
علي بال مجبتهم من محطة مصر ومحطة أتوبيس شرق الدلتا نرجع للتاكسي
علشان البنزين مش يستحمل اتكلم اكتر وقف التاكس أمام تلك الحديقة
ونزلنا فبينما دخل كل من بدراوى وخالد في نقاش حول هل ندخل ونبحث
أم نتصل بالزملاء المتطوعين كلجنة إستقبال والله تعبوا معنا

أسرعت بالمبادرة واتصلنا بزعيم الإحلاف مصطفي صلاح (مش عارف)
طب وانا ذنبي أيه انه مش عارف الراجل شافني كالعملاق القادم لهدم المعبد
فإشار بإصبعية السبابة والواسطي قال أيه عاوز يجاورني في الجنه علي إساس
أنه كافل الأيتام والتائهين مثلنا ههه
وجاء الملأ(المعتصم)
ليقبلني ثلاث مرات علي الطريقة الإسلامية
بس مخلتوش يكمل أصلي بتكلم بسرعه كنا متأخرين ربع ساعه
بس إبتسامته
مش تخوفنا يا ريس
محاذاة إلى الوسط العسل حسستنا أننا تم العفو عنا( مهو زعيم حلف بقا)
وفي كافتريا مختارة وجدتهم جالسون فيما يشبة الدائرة التي ينقصها
الكثير
من الزملاء الاعزاء اللي مجوش واكيد لظروف خارجة عن إرادتهم
فعلاُ لقاء ممتاز ممكن أعبر عنه أكتر بالصور اللي
مع خالد فودة الباحث عن المتاعب ومع بدراوى
بس النت زفت
ومنتظر تحميلهم ومقدرش طبعا أقول شيء أكتر من اللي
قالته الأستاذة/فاتيما(روح قلب ماما) بمدونتها
لكن هنزلكم كلمات
كتبتها قبل إنتهاء اللقاء أعبر فيها عن تقديري
وأعتزازى بهؤلاء المتميزون

أوقات سارة
وسط الخضرة وأشعة الشمس الحارة
وينابيع الماء السائر بالقنوات والحفرة
جاء الكيبورديين للقاء جامع يغتنمون الفرص السارة
وتجسد الكيبورديين أمام البعض في لحظات سارة
فتعالت منهم الإبتسامات تحمل أحاسيس الأسرة البارة
جاء اليوم وقد كانت أشعات الشمس غير ضارة
فقد عزمت أن تستمتع معنا بسعادة لا تأتي غير مرة ومرة

وتحالف النخل المزروع بحدائق تتميز بالخضرة
أن يجعل من طوله ظلال يحمينا
فتحول يوم لقاءنا إلي أجمل ذكري
بجد يوم رائع تعريت فيه بشخصيتي التي إنطلقت حرة عبر التدوين
تدفعها الصراحة التي نبتت بداخلي منذ فطرتي تعريت وإنكشفت إحاسيسي
في زمن يحكمه المصالح
وليس نداءات القلوب العظيمة بداخلهاالحب والإحترام
الذى نأمله لوجه الله وللإنسانية وإكتسبت صداقات
جعلت قلبي يأخذ عهداُ ليموت بدلاً من خسرانها
فمعا يداً بيد الكيبورديين المصريين مفيش قدامهم حد
( ولا جمعة أصل اللقاء جه السبت بس)

هتوحشونييييييي لحين رؤياكم وكل سنة وأنتم بخير وبعافية من مولاكم
.... تحية لعدولة صاحب
مدونة البلد دى فيها حكومة (لأنه الوحيد اللي شرب قهوة)

وشكرا لدكتورة ستيتة علي الدعوة الجميلة دى
وروحها المرحة
وأيضا أستاذة فاتيما لإحتوائها بكل حنان وتشجيع
للمدونين
وإدارتها للتعارف
وللأستاذ صلاح (فشكول) الراجل إنسان طيب عالطول

هناك 26 تعليقًا:

mimi يقول...

أسمي مش مكتوب هناااااااااا

عاااااااااااااااا

طب أنا فين بقي يا رامز؟

ولا كلمة؟

ولا حتي حرف ؟؟؟

إهئ إهئ إهئ

ريمان يقول...

هههههههههههههههه


العنوان توحفه يا رامز

يا سلام على خفه دمك


اكيد كان يوم سعيد


بجد كان نفسى اكون معاكم والله


تحياتى


ربنا يجعل ايامك كلها فرح وسعاده


استاذ فشكول مش اتصور معاكم ليه بقى؟


ينفع كده

mimi يقول...

ايه ده ؟

أنا كنت أول تعليق !!

بما إني بتفائل بأول تعليق ... فخلاص يا رامز عفونا عنك

تحياتي

فرصة سعيدة جدا إني قابلتك

إن شاء الله هتتكرر

رامز عباس يقول...

والله يا ميما غصب عني بقت زي الاهبل بالزفة وكل مسال خالد مين دى يطلع مش مركز فانا استئذنت روح قلب ماما تسالكم موافقين ننزل الصورة ومن خلال اساميكم عندها هعمل شغل افضل

رامز عباس يقول...

والله كان يوم حلو دا حتي المعتصم قال مجتش ليه ميعرفش انك دمياطية ههههههه

adel يقول...

رامز :)
ربنا يخليك علي الكلام الجامد ده :9
وبعيد عنك انا مدمن قهوة سادة :):)

بجد انا انبسطت بمعرفتك قوي و اني شفتك النهاردة و مستني الصور بقي و الميل مع
خالد بقي :)

الشعب لابد له من حكومه تشكمه يقول...

اول مره فى زياره ليك للاسف مش عارفه ازاى مجيتش هنا قبل كده..
وبما ان كل اللى قلتهم دول اخواتى الاعزاء وكان نفسى اشوفهم جداااااا فمرسى انك خلتنى احس انى موجوده..
الا فين سنيور هانى المصرى دائما ومستر بدراوى المنفعل دائما:))
متغاااااااااظه متغااااااااااظه..يلا خيرها فى غيرها ان شاء الله:)

فاتيما يقول...

متعيطيش يا ميمى
معلش الولد جاى تعبان ومرهق من المشوار
سماح النوبة دى
كلك ذوق يا رامز
و إنتا كمان نورتنا و نرجو إننا منكونش تقلنا عليك و ضايقنك بأى حاجة إنتا عارف اللقاءت الاولى ببتبقى فطرية كدا و على سجيتها و دا اللى بيديها جمال و ذكرى حلوة زى ما قولت
و لو سمحت متكحش ف وشنا عشان الإنفونزا اللى ماشية ف البلد الأيام
آه و تعالى هنا
بقى مش عارف إسمه إيه يا شيخ ؟!!
هتودنا فى داهية شكلكم

ستيته حسب الله الحمش يقول...

يا رامز ابعبر عن شعوري ازاي

معرفتك النهاردة انت وخالد فودة تستاهل الدبح
لأ متفهمنيش صح
ههههههههههههههههههههههههههه

اتشرفت قوي وفرحت قوي برؤيتك وفعلا انت انسان جميل وعجباني روحك قوي

اياك ثم اياك "صباع السبابة مرفوع في وش المدونة" تغيب او تقول مش ها أدون

تحياتي

بدراوى يقول...

كلام جميل يا رامز
شرفت بيك اوووووووووووووووى
و بكل الناس

شرفت بالعطلة بتاعت حضرتك فى اول ما جيت رمسيس
ههههههههه

انتظروا بعد دقائق بوست سريع عن اللقاء
عشان انا مسافر بكره القاهرة تانى
:-)

mohamed ghalia يقول...

باشا
نورت اللقاء والله
سعيد جدااااااااااا إنى اتعرفت عليك
ربنا يكرمك ويسعدك دايما

mizohart2010 يقول...

بجد الله عليك يارامز
باين انه كان يوم حلو يارب تفضل ايامك كله حلوه
ميزو الاسكندرانى عندما تنظر الى قرص الشمس اذكرنى

بنوتة مصرية يقول...

طب انا مكنتش معاكم لية
؟
كوسة
بجد زعلانة منكم انتم بتتفقوا امتى ياجماعة هو انا مش على الخط خالص
بس عموما اعملوا حسابكم المرة اللى جاية اول دعوة لية اتفقنا ولالا

خالد فوده - Khaled fouda يقول...

عم رامز انا برضو تعبتك
ماشي ياعم افتكر كده بس

بقيه الصور عندي

hasona يقول...

السلام عليكم

أكيد كان لقاء جميل و ممتع
لأنه في مكان جميل
وجمع ناس حلوين
وجمع بين أفئدة وعقول نيرة
فكل المقاييس تجمعت ليصبح لقاء رائع
ان شاء الله يتكرر
ويزيد العدد والعدة والتعداد
قلوب تجتمع في الله وفي حب الله
تغلفها المحبة والجمال الداخلي قبل الخارجي

تحياتي

Eno يقول...

كل لقاء مدونين وانت بخير :)

اللقاء الحقيقه كان حلو اوووووي والوقت كان بجد لذيذ ومناقشات ممتعه :)

تحياتي

بنجاواتى يقول...

ما شاء الله يا أستاذ رامز

كلكم مبسوطين باللقاء
انا زعلان انى ما حضرتش معاكم

لكن ملحوقة ومتعوضة بإذن الله

تحياتى

أم مالك يقول...

واضح انك انسان جميل قوى
بشهادة الشهود المقربين والبعيدين
اللى انا منهم
لكن من الان ومنذ دخولى الاول عندك
اصبحت الابن المقرب
ومن الزمرة المدونتية القريبة جدا للقلب
ربنا يبارك لك يابنى ودمت بخير

د. ياسر عمر عبد الفتاح يقول...

ازيك يا رامز
أنا سعيد إني اتعرفت عليك بجد
إنت إنسان جميل

يارب أشوفك دايماً علي خير

أحمـــــــــــــد أبو العلا يقول...

رامز الجميل

للأسف ملحقتش اشبع من القعده معاك لكني مؤمن ان ان شاء اللي الفرض القادمه اكتر بكتير

انا سعيد بالتعرف على شخصيه هادئه زيك واتمنى دوام التواصل

المعتصم يقول...

والله شكلك كده هتفضل تقر عليا لما ياخدونى امن الدوله
زعيم الاحلاف والملا مرة واحده
حرام عليك انا عاوز اتجوز ياعم
هههههههههههههههههه
بس بجد اليوم كان جميل والاجمل انى اتعرفت فيه على ناس روعه
وفكرهم عالى جدا
وكفايه عليك كده يارامز علشان انت تعبتنى اوى امبارح
ههههههههههههههههههههههههه
بس على فكرة انا مبسوط انى شوفتك امبارح بغض النظر عن التعب (:
ســــــــــــــــــــلام

كيكى عوووووو يقول...

أزيييييييييييييييييييييييييك؟؟
عارف انا طول اللقاء كنت عايزة اقوم اكلم معاك واخد اللينك وعاملة اسال هو قال اسمه مدونته ايه؟؟ هو بس قال رامز عباس رامز عباس رامز عباس واقول فى بالى طب مااااااااايقول اسم مدونته ايه دة؟؟
ال ان وصلت الحمد الله
لولوولىىىىىىىىىىىىىىىىىىىىى
وكمان كان كفايه الثقافة والادب والتاريخ الى كنت بتتكلم فيهم واحنا فى اللقاء كمان فى البوست
حرام عليك عقدتنى
***بجد انت مصدر للفخر**

مسدس صغير يقول...

والله انا سعيد جدا بيك
وفرحان اوى انى عرفت واحد زيك
فى عزيمتك
وتصويرك والكاميرا اللى بتفصل منك
حاجة جميلة خالص
هههههههههه
احييك على البوست

مصري جدا يقول...

اية يا عم دة الكاميرا بتاعتك بايظة
انا صورتي كدة
طب شعري راح فين

ان ما هبدتك بوست بس أصبر عليا

darsh يقول...

حقيقي كان يوم تحفة .. ويكفي اني اتعرفت على الشخصيات الجميلةدي

واتمنى من كل قلبي اللقاء يتكرر

مصطفى حسان

ذو الوجه المبتسم يقول...

كل سنة والجميع بخير

رمضان كريم