27‏/11‏/2009

(رسالة فى حب مصـــــــــــــــــر)



بقلم المدون /رامز عباس
الثلاثاء 24 نوفمبر 2009


بلدى يا مصر أنتى جنان
أجمل أرض خلقها الرحمان
ونيلك عظيم عمال بيجرى
ويسقى فى طريقه كل عطشان
يا نسمة وسط البلدان
حاكمينك لصوص ورعاع
كل اللى هاممهم التاج والصولجان
والعرش بتاعك بقى كدة حيران
والشعب قاعد يتحسر سامعينــه
أهـــــــــــو ….. بيقول آه يا زمان
ورامز عباس حيران هو كمان
وكل يوم الناس تترشح لإنتخابات
علشان تحكم شعب كله حنان
واللى بيترشح نافش ريشه
وكمان فى الأصل ملوش أمان
والله يا مصر أنا حيران
وشايف فيكى الأنسان غلبان
ولا حدش طايل ثروة و لا عنده حتى فدان
كل اللى طايله شعبك هو الحرمان
وأمشى ألاقى واحد متسول
وواحد تانى كدة عريان
وواحد تالت ماشى تعبان
وواحد رابع رغم الضحكة جعان
وواحد خامس واخدينه عاللومان
وواحد سادس شاف الأسعار
أكبر منه جاله جنان
وأنا على قدى بنوى أعارض
كدة حكومتنا وأسألهم ليه الحرمان
لية سايبين الشعب للأدمان
ليه واقفين ضد الأمن والأطمئنان
ضد الراحة اللى بجد والأمان
ضد الناس الصبح وبالليل كمان
ضد الحرية وضد الغنوة والألحان
ضد الفرحة لو عدت سهو
ضد الحزن علشان عنوان للإستهجان
ضد أنه يكون الطفل نبيه
واعى ان حقوقه ضايعه كمان
ضد البنت تقول العلم الصح أمان
وبكرة أربى ولادى عليه
يعرفوا بيه إزاى كنا وأحنا مين
وهنبقى أية لو قدرنا التاريخ والزمان
بلدى يا مصر أنتى جنان
بعلن ليكى أنى بحبك كمان وكمان
أفتحى دايما حضنك ليا
حضنك الواسع الفتان
ولو أنا زعلتك متكرهنيش
وأطبعى قبلة حب على رأسى
لو قصرت معاكى فى يوم مدام ندمان
يلا يا مصر خدينى فى حضنك
وأعلنى أنى كأبن بتحبينى كمان وكمان
خلى العالم يفخر بيا
وجموع الناس تبقى حواليا
وتقولى بعلو الصوت مع بعض
يا أبن مصر بلدك جنان
أجمل أرض خلقها الرحمان
والنيل فيها عمال يجرى
يسقى العطشان
تحية يا مصر يا أجمل بلد
تحية جميلة وورد كمان
بحبك يا بلدى وقلبى شهيد
بيشهد بأنى فى هواكى سعيد
وأنى بقيت زى العبيد
فى خدمة هواكى كدة من زمان
تحية يا مصر يا أم الجنود
شجعان بلدنا دول زى الأسود
وكل اللى بيحصل ده عند الحدود
خيانة رئيسنا عميل أمريكان
وده ذنب واحد من وسط الجموع
قابل أنه يركع وفى عينه دموع
علشان أسرائيل حبيبته كمان

هناك 3 تعليقات:

ستيته حسب الله الحمش يقول...

كل سنة وانت طيب يا رامز
روعة روعة الشعر ده وربنا يعفي عن مصر يا رامز من عميل الأمريكان

الزنارى يقول...

مصر فوق الجميع دائما رغم حقد الحاقدين و تربص المتربصين .
أحييك على رسالتك العظيمة فى حب مصر الأعظم .
مع خالص الاحترام و التقدير
أحمد الزنارى

ريمان يقول...

الله الله عليك يا رامز



بجد حلو اوى اوى البوست


تسلم اديك


ربنا يباركلك يا رب ويسعدك


وربنا يصلح حال بلدنا مصر ويصلح حال الامه