18‏/08‏/2010

لسنا كما تظنون،،، فتراب مصر له علينا أيضا واجب


حوار مع الكاتب شمعي أسعد صاحب مدونة قصاقيص ورق
ومؤلف كتاب حارة النصارى ومحرر صفحة المدونات بجريدة الجيل

صورة أرشيفية لشمعي أسعد وعلي يساره الكاتبة الكبيرة ، نوارة نجم
صاحبة مدونة جبهة التهييس الشعبية وأحدي كتاب الأعمدة بجريدة الدستور المستقلة

أدار الحوار رامز عباس

الحوار مع شمعي أسعد ليس حواراً عادياً بل حوار توضيح حقائق لبشر مثلنا وهم أبناء لمصر
التى أحياناً لا تعترف بهم بل تتجه لتخوينهم لأسباب ليس بالإمكان حصرها في حوارصحفي بسيط
بل نحن بحاجة ماسه لدراسة الأسباب ومعرفتها وعلاجها
لنوقف نزيف إنعدام الثقة بين قطبي الأمة المصرية
نحاور شمعي الذي قدم لكتابه حارة النصارى والذى يكشف فيه كثير من الأمور المغلوطة
التي صدرتها لنا أجهزة الدولة لغرض في نفس يعقوب
بصورة تجعلنا موغلين في جريمة تخوين الأخر
قال شمعي يقدم كتابه((عزيزى المسلم
إذا كانوا قد قالوا لك إن "المسيحيين ريحتهم وحشة" حتى أقنعوك،
وإذا كان أحدهم قد أخبرك بيقين أن الأديرة تعج بالأسود والنمور لتأديب المرتدين عن المسيحية
وصدقت أنت ذلك،
وإذا كانوا قد رددوا كثيراً على مسمعك أن الكنائس لم تعد كنائس
بل صارت مخازن أسلحة وذخيرة حتى صرت تنزعج من وجود الكنائس،
إذا كنت صدقت أن "الأقباط خونة"،
أو أن رجال الدين المسيحى يلبسون ملابس الحداد حزناً على وجودك أنت شخصياً....
فانت تحتاج لقراءة هذا الكتاب ))
وحتي لا نطيل عليكم فإلي حوار هام مع الناشط والمدون شمعي أسعد


س1 :أ/ شمعي في البداية أحب أعرف وأيضا قرائي حقيقة مانشر بجريدة المصريون علي الإنترنت
حول القبض علي نجل وكيل مطرانية بورسعيد متلبساً بحمولة متفجرات قادمة من الكيان الصهيوني؟
ج1: جريدة المصريون تتعمد نشر الأكاذيب و بتنشرأكاذيب اصلا
انا قريت فيها كذا حاجة كانت ملفقة وانا على علم بانها ملفقة لانى كنت بصادف عارف الخبر الصح
غير ان من سياق الكلام ومن خبرة معينة بعرف نوعية الاخبار الملفقة
،،عارف انا متصور إن السفينة دى هايطلع اللى فيها ده بمب العيد اصلا
والحكاية كلها حركات عشان تقليب الرأى العام

طب خد عندك
حكم الزواج التانى اللى المحكمة تراجعت عنه تحس انه اصلا صدر لتهييج الرأى العام
موضوع السفينة هايطلع كده برده وعايز أطمنك ثق لو الكنايس فيها أسلحة
كان لازم يطلع مننا ناس تفتن علينا
كلنا مهو كلنا مش ممكن نكون علي نفس درجة الولاء يعني
أكيد ناس هتعترض علي وجود أسلحة ونترجم ده عملي بأنها تكشف الموضوع
صح ولا لا


س2: حاسس في كلامك ثقة تامة رغم إحتمالية أنه يكون العكس؟؟
ج2: أنت ليه مصر تنساق ورا أخبار منقوصة وتساهم في نشرها
زي ما تكون لقيتها حلوة لتخوين الاقباط انا ساعات بشوف حاجات بتكون مغرية جدا للشير
بس لما بوزنها بلاقى ان ممكن صديق مسلم يزعل

اقوم اتراجع فورا بفكر كتير جدا قبل اعادة نشر اى حاجة
تتخيل كمية الحاجات اللى الواحد بيقابلها ويقدر ينشرها وطظ فى أى حد
بس مش بسمح لنفسى بكده لانى دايما حاطط خاطر اصداقائى قدام عينى
بس انت ساهمت انت والمدون عبدالرحمن فارس وكل من روج الخبر فى نشر روح الكراهية

لان اللى ها يقرا هايصدق
ولما يصدق هايقول فى باله فعلا القبط دول خونة ولاد كلب انا لما قريت التعليقات اتوجعت

س3: منا نشرت لاعتبارات تانية؟!
ج3:انا بحب دايما ارجح اعتبار على حساب اعتبار
يعنى مثلا زي ما قولت انا ساعات بشوف حاجات بتكون مغرية جدا للشير
بس لما بوزنها بلاقى ان ممكن صديق مسلم يزعل
اقوم اتراجع فورا

س4: يا شمعي الخبر لما اتنشر النائب العام اتدخل ووزير الداخلية اصدر امر اعتقال والمحامي نبيه الوحش طالب بتفتيش الكنائس التابعة للمطرانية وأنا شايف ان تصرف نبيه الوحش شىء طبيعي؟
ج4 :شوف ياأ/ رامز
لا عمر الكنايس كان فيها اسلحة ولا هيكون وتتفتش ليه اصلا
ماهى الكنايس عليها حراسة اصلا كل كنيسة عليها اتنين عساكر
فى الايام العادية وامن دولة فى الاعياد
س5: دول لحمايتكم؟!!!!!

ج5:مين قال انها لحمايتنا ده شكلا بس فعليا هى للمراقبة
هل نجحوا فى حماية اى كنيسة من اى اعتداء؟
هل قاموا بحمايتنا فى نجع حمادى
هل حمونا فى حادث القتيل بتاعة كنيسة اسكندرية
هل قاموا بذلك ايام ارهاب التسعينيات
س6: يعني انت مش شايف برضه انها تفتش دراء لأي احداث فتنه؟
ج6:أكرر وتتفتش ليه اصلا ماهو وجود شرطة عليها ده فى حد ذاته
حقق الهدف بتاع التفتيش

هل ممكن نخبى فيها اسلحة وامن الدولة ميعرفش
والشرطة حاطة حراسة تحت مسمى الحماية اللى بتفشل كل مرة فى الحماية
جاوبنى؟
س7: أنا معاك بس مادام المساجد نفسها بتتعرض للتفتيش يبقي الكنائس أيضا لازم نكون محايدين؟
ج7: مع إحترامي ليك ده مش حياد
ده انحياز لفكرة مسبقة وده اللي أنت والمدون عبدالرحمن فارس فعلتوه
وكل من روج الخبر فى نشر روح الكراهية

لان اللى ها يقرا هايصدق
ولما يصدق هايقول فى باله فعلا القبط دول خونة ولاد كلب
س8: أعتقد انك مركز علينا بشكل يوحي لي أنك بتتمتع بروح عنصرية إتجاهنا؟
ج8: يبتسم ، مش للدرجة دي شوف انا مصرى اولا
مسيحى ثانيا مش العكس
ويضيف :من اسبوع قعدت مع صديق من الاخوان
يضحك متذكراً الموقف
تخيل عنده قناعة تامة اننا خونة
واننا مخبيين اسلحة واننا هنجيب امريكا تحكم مصر
قلت له يا احمد اللى قال ممكن اجيب ماليزى يحكم مصر هو اللى خاين مش انا
واللى عمل عرض عسكرى هو اللى مخبى اسلحة مش انا واللى ولاءه مش لمصر
هو اللى قال طز فى مصر مش انا
عارف انا حاسس بايه
بجد حاسس بوجع شىء صعب جدا انك عايش متخون فى بلدك
ومتهم دائما اما بالولاء لغير بلدك
او مخبى اسلحة عشان تحارب اهل بلدك شىء فعلا مقزز؟
س9:انا اساسا مقدر اللي بيحصلكم بس بصراحة حجم انتشار شيوخ التطرف وده منقدرش نمنعه منتا عارف؟
ج9: المتطرفون أعلم ولكن لا يجب ان نردد ما كل يقولونه

س10: نشكرك جداً بس سؤال أخير أ/ شمعي تحب تقول أيه لقرائنا؟
ج10: أقولهم ياريت تتأكدوا من المعلومات قبل ما تتهمونا بأشياء وأمور بتهد بلدنا
أكتر ما بنبني فيها وحاجات كتير لازم تعرفوها وتخدوا فكرة عنها
زي سر الاعتراف برده غير ما أنتم فاهمينه خالص

أقاطعه :
احنا بنفهمه كاعترافكم بالخطيئة
او ما يخالف تعاليمكم
شمعي: لا ده ده طقس من طقوسنا هو اسمه اصلا سر التوبة
بمعنى اننا نعترف بمعاصينا لله امام أب كاهن
دور الكاهن هنا مش انه هو اللى بيغفر ولا هو اللى بيتلقى التوبة
لا هو مجرد مرشد روحى
وله جور كمان تقدر تقول نفسى
انت لما تقول ذنب معين على مسمع حدد
بيكون ثقيل جدا انك تكرره تانى
بالاضافة ان الموضوع بيكون شبه الطبيب النفسي
فكرة انك تزيح هم من على قلبك فتحس براحة وبنسمه سر التوبة
او سر الاعتراف كلمة سر هنا
زى ما تقول عندكم كده اركان الاسلام احنا عندنا الاسرار السبعة
كلمة سر لا تعنى شىء خفى بل تعنى انه امر مقدس
والهدف منه هو التوبة
وانا كمان شارح كل ه فى كتابى حارة النصارى الصادر عن دار نشر دون
وهتلاقيه متوافر في مكتبات متعددة وهينزل منه الطبعة التانية كمان أسبوع















































































































هناك 6 تعليقات:

يوسف مسعد يوسف يقول...

حوار ممتع وهداف . فمن يحارب هذه الأمه وبث نار الفتنه بين طرفى الأمه يجب علينا أن نرفضه ونخرجه من بين الصفوف لتبقى دائما مصر يدا واحده تحت رايه واحده رايه الحب والتراحم .

Ashrf يقول...


بص يا رامز مع احترامى للضيف
اولا :- الاقباط مش عاوزيين يحاربوا البلد انما ادخل منتدياتهم وهتعرف انهم عاوزين يحرروا مصر مما يسموه بالغزو الاسلامى دا على اساس ان مصر القبطيه محتله من قبل المسلمين من ايام عمرو بن العاص
-------
الباشا بيهاجم الاخوان وانا مش بحبهم وانت عارف بس هما لما عملوا العرض العسكرى مكنش فى السر دا علنا مش مخبيين حاجه وانا بقول انى مش معاهم ومع ذلك دا كان نوع من الاحتجاج على الظلم
الظلم اللى بنتعرض له يوميا
--------
الامن اللى فشل فى الحمايه اكيد هيفشل فى المراقبه وليه ميكونش قابض فالتفتيش كان ضرورى
--------
احب افكر الاخ ان الحقائق مش دايما بتتنشر عن الاقباط وهضرب مثال بالمسرحيه المسيئة لرسول الله صلى الله عليه وسلم فى كنيسة فى الاسكندرية واتحطت على النت وانا شفت جزء منها ومع ذلك النائب العام حينها علشان يقفلوا الموضوع وميحصلش مشاكل انكر وجودها بالرغم من انها حقيقة وواقعة
------
فى الاخر احب اقول له
ان مسلم اولا
ومصرى ثانيا
ومش بكره الاقباط ومعتقدش ان ريحتهم وحشه الا لو واحد مش بيستحمى طبعا

عبدالرحمن فارس يقول...

بداية أنا معترض وبشده على ما نسب ليا من أنني سامهمت في الترويج لروح الكراهية
لإن في هذا تجني واضح
ولي عتاب عليك يا رامز
كان من الواجب عليك أن تسألني فيما نسب الي

ثانياً أنا لم أطلع على ما كتبته أنت يا رامز حتى أعلم ان كنت تغذي الكراهيه أم لا

ثالثا أدعوك وأدعوا كل المتابعين لمدونتك لقراءة ما كتبت والتمعن فيه وبعدها قولوا كلمتكم ان كان ما كتبته كلاما عاقلا أم كلاما يغذي الكراهية كما يدعي شمعي


يا عزيزي رامز هذا ما كتبته في صفحتي على الفيس بوك بالحرف الواحد
وأدعوك أنت والجميع لقراءتها بتتمعن
وعناية وأن تتفكر أيضا في اخر سطرين فيها وترى هل اقصد الكراهية أم أقصد ماذا

( رغم تشككي في صحة أن تكون سفينة السلاح القادمة من إسرائيل متوجهه الى الكنيسة المصرية ، لكن لدرء الفتن والشبهات وإثبات حسن النوايا .. يجب على القائمين على أمر الكنيسة المصرية فتح أبوابها لوسائل الإعلام قبل فتحها للتفتيش الأمني .. لإخراس كل الألسنة التي من الممكن أن تشكك في وطنية المسيحين المخلصين من أبناء هذا الوطن)

هذا هو ما كتبته بالحرف الواحد يا عزيزي رامز
ولمزيد من التأكيد على ما كتبته أنا قم بزيارة هذا الرابط
http://www.facebook.com/abdelrahman.fares?v=wall&story_fbid=128057823907427


فهل فيه رائحة للكراهية

فإذا كان ما كتبت يروح الكراهية فأنا أول الكارهين لك يا شمعي

شمعى أسعد يقول...

Ashraf
---------

شوف يا اشرف

انا ضد مقولة ان المسلمين محتلين ولازم يخرجوا من البلد
ده كلام مش منطقى ولا معقول
ولا حتى الافباط بيرددوه بالشكل ده
لكن اللى بيحصل ان لما حد بيقولهم انتوا خونة طبيعى بيكون الرد ان الاقباط اصل البلد
مجرد لغة دفاعية ورد فعل طبيعى

لكن بفرح لما بلاقى مسلم بيرفض تصنيف الاقباط كخونة
واللى زى ده حرام يسمع من حد قبطى كلمة انت مش مصرى انت محتل

صدقنى الموضوع كله شوية زعل من الجانبين
ارفع الزعل تختلف اللغة فورا

---
انا زيك ضد الاخوان
لانى ضد اى حكم دينى
وبالمناسبة انا ضدهم فكريا مش انسانيا
بمعنى انى كمان ضد اى تعذيب يتعرضله اى اخوانى لمجرد انتمائه
فضلا عن ان لي اصدقاء اخوان
اما موضوع العرض العسكرى
فكونه فى العلن لا يعطيه شرعية
واما كونك بتقول اننا مخبيين حاجة
فثق ان دى اشاعات تم ترويجها وغير صحيحة بالمرة والا فالبينة على من ادعى

واحذر ان تصيب قوم بجهالة
احنا مش فى حرب يا صديقى
ولا بنؤمن بمفهوم الجهاد المسلح اصلا
يبقى هانخزن اسلحة ليه ولمين
وهل منقطى فى رايك ان من اكتر من 30 سنة بيتقال اننا مخبيين اسلحة
وشايلنها لحد دلقوتى؟
طب مظهرتش ليه
ومين اللى بيتدرب عليها
هل هى اسلحة بدون خطة تدريب؟
طب ولحد امتى؟
وليه مظهرتش فى كل الاحداث الطائفية اللى حصلت

السؤال الاهم
انت لو مكانى وكل شوية تسمع جار او صديق او اى حد بيقول انتم مخبيين اسلحة
ويحمل الكلام تهمة تخوين تحس بايه؟
وفى النهاية انت اللى زعلان لما تقرا على المنتديات كلام دفاعى زى اللى كتبته ده؟
طب بزمتك مين اللى يزعل؟

مرضى يا باشا؟

شمعى أسعد يقول...

عبد الرحمن
------------
انا لم اتهمك انت او رامز بترويج الكراهية

وقرأت ما كتبته جيدا

فقط كنت اعاتب رامز فى تعليق كتبه عندك
كان يحمل روح السخرية وفى تعليق اخر كان يردد ما قلته انت من ضرورة تفتيش الكنائس

وفى نهاية الحوار اللى كان ارتجالى اصلا
جات فكرة نشره

الفكرة يا عبد الرحمن
هو ان الشروق كتبت الخبر بطريقة مستفزة جدا وفيها ايهام للقارىء بان المسيحيين بيجيبوا اسلحة من اسرائيل
تهمة بشعة لو صدقت لكره كل مسلم كافة الاقباط فى مصر وسيكون ذلك حقه

وده يخللى الشروق فى نظرى تنزل لمستوى الصحف الرديئة
لان دى حاجة مفهاش هزار وماينفعش تتكتب بدون دقة

وفى النهاية طلع الخبر زى ما توقعت بالظبط
ان المتفرجات المشار اليها فى الخبر كانت صواريخ العيد
وطلعت السفينة جاية من الصين
طب ايه اللى جاب الصين لاسرائيل

طب انت دورك ايه؟
فكرة اننا نعيد نشر اخبار بالخطورة دى
واصلا مشكوك فى دقتها
وواضح انها كتبت باستعجال

ده من غير ماتقصد بينشر الكراهية
لان عبد الرحمن له مصداقية عند ناس كتيرة
زى ما الشروق ليها مصداقية عند الاف القراء
فاللى ها يقرا الخبر من خلالك غالبا هايقراه وهو ميال للتصديق
وكمان الشروق هى المصدر
يبقى فاضل ايه عشان نصدق

ضيف على كده
ان اى حد لما بيقرا اخبار عن الاخر
كل ما كان الخبر سىء ويقلل من شأن هذا الاخر بيكون سهل تصديقه عن تلك الاخبار التى تنصف الاخر وتصحح صورته

عشان كده انا شخصيا لما بسمع اى خبر لازم قبل ما انشره انتظر تأكيده من مصادر اخرى
انا مثلا لما سمعت عن حادث نجع حمادى
مستعجلتش اكتب قبل ما اتحقق
رغم مصداقية اول من عرفت منه
لكن حساسية الموضوع تستحق الانتظار والتأكد

واكبر دليل على كلامى
هى التعليقات التى نشرت على موقع الشروق تحت الخبر
كلها للاسف كانت تحمل استعدادا قويا للتصديق وعبرت للاسف الشديد عن روح الكراهية التى تعتمل فى بعض النفوس

ولما اقصد باى حال من الاحوال ان امس شخصك او اتهمك بانك تروج للكراهية
--
اما دعوتك لتفتيش الكنائس
فهل من حقى ان اتهمك يا عبد الرحمن انك تخبىء اسلحة فى بيتك ثم اهيج عليك الرأى العام
ثم اطالب بانتهاك حرمة بيتك وتفتيشه

هل مطلوب منك ان تتفرغ للدفاع عن كل تهمة توجه اليك
بدلا من نطلب من الذى يتهمك بتقديم دليل على ذلك

على اى اساس تم توجيه تهمة تخزين الاسلحة للمسيحيين
هل رأى احدكم شيئا يؤكد ذلك
هل مجرد ترديد اشاعة يعد سند قانونى يتطلب التفتيش

وماهو موقفك بعد ان وجدت ان السفينة المزعومة كانت قادمة من الصين وليس من اسرائيل
وان ما كان عليها كانت صواريخ عيد للاطفال وهى التى وصفها الخبر بالمتفجرات
مما اوحى للقراء المستعدين اصلا للتصديق
انها قنابل لتخزينها فى الكنائس

اى منطق يحكم الامور؟؟

شمعى أسعد يقول...

يوسف مسعد يوسف
----------------

اشكرك جدا
هذا ما اتوقعه من كل محب خقيقى لمصر