05‏/04‏/2009

في ذكري إبريل ---- أوبريت حلم الإضراب

في هذا التوقيت الحرج من زمن الأمة المصرية المهانة داخلياً
أقدم إليكم أوبريت الحلم العربي..... بعد معالجته فنياً ليصبح
أوبريت حلم الإضراب الذى جاء لحياتنا الفوضوية ليزيدها فوضي
المعالجة الفنية للمدون/ رامز عباس
5 إبريل
إليــــــــــــــــكم
إضراب ورا إضراب
والثورة جاية وراهم
والناس بتهتف تقول
أحنا هنضرب معاكم
جايز ظلام الرئيس
يبعد في شمس الحرية
لكن شعاع الثورة
هيجمعنا وياكم
يا حلمنا طول السنة في إضراب كبير
يجمعنا كلنا كلنا
الحلم مهو مستحيل مدام معاك كيبورد
والماوس مش تقيل
والويندز زى الفل
هتخش الفيس وتهيج في المجاميع والكل (فيس بوك)
كن انت بالاب توب في الشارع
ان كان ليك شيله في شنطة
وحاول توصل لمظاهرة
بس أوعي يمسكوا فيك
عرف زمنك من تكون
ارضي ضميرك وثور بقا
وبالإضراب تاخد حقوقك
وحقوق كل من يأتي بعد
اتحدى حبيب العادلي
واتعلم تبقي جريء
وف كل مظاهرة روح أهتف
والأمن يقلبها حريق
العدل محتاج لشباب
زى بتوع سته إبريل
يطلعوا يهتفوا في مظاهرات
دول ولاد بلد وراضعين من النيل
من كل مكان في النت
ناطقين كلمة إضراب
وبأعلي الصوت والنبض
هاتفين تحيا الإضراب
شباب سته إبريل
عيون مليانه بشارة
عاملين حركة سياسية
وفي المظاهرات بيرموا حجارة
ومعانا ثوروا وقولوا
يلا نعمل إضراب
دا الناس من الغلب إتخنقت
وأحلامهم بقت سراب
كلمة صدق في تدوينة
علي جايكو أو في تويتر
يمكن من بعد ساعات
الكل يروح تخشيبة
خلي الأماني حقيقة
واحسب وقت وقوفك في الميدان
الأمن خلي الشوارع غليقة
ولو اتمسكت يفتحولك في السجن باب
والبوستات بتلغي حدود
ووطنها هو الموقع
ومدام عايشين هندون
ومدام قادرين هنواصل
الإضراب مهو بالكلمة
بالفعل وبالاحساس
شارك بالذوق والحكمة
وتوعي في عقول الناس
حلمنا أحنا السياسيين
وحدة مصر المسلوبة
كل الخلافات هتزول
بدل الأحوال المقلوبة
خليك سياسي شجاع
ومتخفش من الإضراب
أهتف للناس واصحابك
هتلاقي الشعب بأصالته معاك
بلغات العالم ثوروا
واختصروا ساعات في ثواني
قدر الداخلية تعذب
وقدرنا ندون تاني
نتمني إضرابنا يكون
ونغير أي سكون
ما كتير من الناس مسجونة
ومن اللي شافوه جالهم جنون

هناك 5 تعليقات:

مختار الجندى يقول...

ولكن هل سينجح هذا العام ام انهم مستعدون لنا ؟

ريمان يقول...

هههههههههههههههههه

ايه ده يا رامز

كلماتك دى طبعا صح؟

ميه ميه يا رامز واله وخفه دم لا يعلى عليها

بس انا نفسى اعرف اهداف اضراب السنه دى ايه

وتفتكر هينجح ولا لاء


الله المستعان

mizohart2010 يقول...
أزال المؤلف هذا التعليق.
mizohart2010 يقول...

يلا نعمل إضراب
دا الناس من الغلب إتخنقت
وأحلامهم بقت سراب
انت قولتها يا صحبى الحلم بقى سراب
تفتكر المظاهر او الاضراب حتعمل حاجه تفتكر مش عرفين بحال الشعب و هم يهمهم ايه حسوا يوم بالجوع حسو يوم انى رغيف العيش مش لاقينه حسو يوم انى عيالهم طلعين للدنيا بكل امل فى زمن الحلم فيه مستحيل اقول ايه يا صحبى جونا اهات زاى البركان لو انفجرت تبقى النهايه
بتقول لمين و مين حيسمع لم تتظلم و مش عارف تخد حققك تقول لمين ولا لمين
احنا فى زمن الحلم فيه ممنوع
مكتوب علينا نعيش الواقع واحنا راضينى الشكوى لغير الله مزله هو عالم بحلنا و هو الجبار العزيز المزل مش بتدوم لحد يا صحبى بس هم مش فكرين مين كان قبلهم ومين حيكون بعدهم بس تفتكر ئلى جاى بعدهم حيكون احسن منهم هو ده السؤال ؟؟
للاسف عارف اجابته مستحيل لانى عمر الدنيا محتكون جنه و لا نار فيها الظلم و فيها شعاع نور العدل ده ئلى مصبرنا وخلينا عيشين

خالد فوده - Khaled fouda يقول...

تسلم ايديك

حلوه مره
اخواني