أطفال الغد المشرق هم أبنائنا نحن مدوني القرن

دى أماني ذات 11 سنة بالصف الخامس الأبتدائي
أبنةالمدونة الرائعة والقلب البورسعيدى الكبير أوى أوى ماما أمولة
وأسألوا مدوني بورسعيد طبعاً أتاخرت كتير في تنزيل هذة الكلمات القادمات
لا لشيء رغم أني كاتبهم من شهور ولكن أخذتني الحياة مأخذ لا أحبه ولا أستشرفه
ولكنني رضخت عندما وجدت نفسي وحيدا بلا دعم ولا توجيه
فكيف للغريق في المحيط أن ينجو بلا عوامة وأو لوحاً يطفوا من حوله
فيسرع ليمتطيه دعونا مني فأنا لا أريد أن أتذكر ذلك
دعونا نفرح بهؤلاء الأطفال اللطفاء في عصر يجانبه اللطافة
والظرافة والحب ياه ه ه ه علي كلمة حب دى عمرها أبداً ما أختفت من حياتنا
بس اللي أعرفه وأفهمه هو أن قلوبنا
أتقفلت شوية
أماني أليكي كلماتي وأحسدك علي أمومة ماما أمولة صاحبة
(الزمن الجميل- نسائم الروح)
فكلماتي ليست شعراً وليست نثراً ولكنها قد تكون خواطراً
يا بنت بورسعيد يا طفلة صغيرة
والعقل كبير عنيد بالطيبة مأثرة
يا بنت بورسعيد يا طفله صغيرة
طفلة عايشة البراءة بالعلم منورة
في زمن بقا الشطار فالحين في المسخرة
في زمن خلو التعليم ببلدنا علشان الفشخرة
وزراءنا الكدابين لصوص المندرة
يا بنت بورسعيد ياطفلة صغيرة
أنتي وغيرك أملنا في بلد جديد نظيف
مستقبل جيل جديد ميعرفش المنظرة
يا بنت بورسعيد يا طفلة صغيرة
ساعة الأذان بتجري تسجد وتقول يارب
بتساعد ماما دايما دى البنت سكرة
يا بنت بورسعيد يا طفلة صغيرة
دعواتي ليكي صادقة وتحايا معطرة

2009/4/16- 10 ونص بالليل

عقبال منكتب ليوسف أبن فاتيما وأيضا لأولاد د/ ستية الحمش
ولأولاد كيكي وميمايا وإيمي وكل الناس اللي عندها أولاد أو لسه
في مراحل الإرتباط أو ما قبل الإرتباط أو ما قبل قبل الإرتباط

بعد كدة الكلمات سواء قصيدة أو نثر أو خواطر
الواحدة بربع جنية اللي مش هيدفع مش هيشوف حرف
أمال أيه عاوزين نأكل عيش أمال وعيش فينو كمان

ملحوظة للناس اللي راحة عند مصطفي حسان في حفل توقيعه
ياريت يعني يعني يعني تقولولي هو هيبدأ كام بالظبط وهيخلص كام بالظبط
لأني مرتبط بإجتماع حقوقي جدا جدا بصفتي طالب كوحيتي
بكلية حقوق القاهرة حلوة حقوق القاهرة دى أخر فشخرة